Səudiyyə Ərəbistanı Krallığında müvəqqəti yaşayan Azərbaycan vətəndaşları haqqında qısa məlumat

Azərbaycan Respublikasının Səudiyyə Ərəbistanındakı Səfirliyinin konsulluq bölməsində qeydiyyatda duran Azərbaycan Respublikası vətəndaşlarının sayı 151 nəfərdir. Səfirlik Səudiyyə Ərəbistanından başqa Bəhreyn Krallığı, Yəmən Respublikası və Oman sultanlıqlarına da akkreditasiya olunduğu üçün bu ölkələrdə yaşayan həmvətənlərimizlə də sıx əlaqə saxlayaraq onlara lazımi hüquqi və digər yardımlar göstərir. Yəməndə son zamanlar baş verən proseslərlə əlaqədar bu ölkədəki həmvətənlərimiz evakuasiya edilmişdir. Bundan əlavə Səfirlik Yəmən Respublikasının Ər-Riyaddakı Səfirliyi və Yəmən Xarici İşlər Nazirliyi vasitəsilə bu ölkədə ola biləcək Azərbaycan Respublikası vətəndaşları ilə bağlı mütəmadi olaraq məlumat mübadiləsi həyata keçirir.

Səudiyyə Ərəbistanı Krallığı və Bəhreyn Krallığında yaşayan həmvətənlərimiz əsasən tibb, neft-mədən sənayesi, informasiya və kommunikasiya, eləcə də kiçik biznes sahələrdə fəaliyyət göstərirlər. Bundan əlavə Səfirlikdə konsulluq qeydiyyatında duran həmvətənlərimizin bir qismi krallığın bir sıra təhsil müəssisələrindən təhsil alırlar. Səudiyyə Ərəbistanı Krallığının ən böyük tibb müəssisələrində azərbaycanlı həkimlər öz peşəkarlıqları ilə seçilirlər. Onlardan bir neçəsi işlədikləri tibb müəssisəsinin baş həkimi və yaxud digər məsul vəzifələrində çalışırlar. Həmvətənlərimiz əsasən paytaxt Ər-Riyad şəhəri, eləcə də Xobar, Dammam, Ciddə, Mədinə, Qassim kimi böyük şəhərlərdə yaşayırlar.

Krallıqda azərbaycanlıların diaspora təşkilatı fəaliyyət göstərmir. Təşkilatlanma yalnız Səfirlik vasitəsilə həyata keçirilir. İl ərzində Səfirlik tərəfindən təşkil edilən bütün tədbirlərdə həmvətənlərimizin iştirakı təmin olunur, xüsusən də 31 dekabr Dünya Azərbaycanlılarının Həmrəylik günü Krallıqda yaşayan bütün azərbaycanlılarla həmrəylik və birlik nümayiş etdirmək üçün təntənəli şəkildə qeyd edilir.

Konsulluq münasibətləri

(azərbaycan vətəndaşları üçün) 

Azərbaycan Respublikasının Səudiyyə Ərəbistanı Krallığındakı Səfirliyinin Konsulluq Şöbəsinin ünvanı:

Ər-Riyad şəhəri, Uruba, Əmir bin Səud Ədbülrəhman küçəsi 63

İş saatları: 9:00- 16:00

İstirahət günləri: cümə və şənbə günləri

Tel.: (00966) 11 419 2382

Fax.: (00966) 11 419 2260

P.O. Box:   94005

City: Riyadh

Zip code:    11693

Email :riyadh@mission.mfa.gov.az

Web-Site: www.riyadh.mfa.gov.az

Səudiyyə Ərəbistanına səfər etmək istəyən Azərbaycan Respublikası vətəndaşları krallığın ölkəmizdəki səfirliyindən viza əldə etməlidirlər. AR vətəndaşlarına nisbətdə birdəfəlik giriş-çıxış vizası üçün həmvətənlərimiz 532 ABŞ dolları, çoxdəfəli giriş-çıxış vizası üçün etibarlılıq müddətindən asılı olaraq 6 aylıq 800 ABŞ dolları , 1 illik 1332 ABŞ dolları  və 2 illik 2131 ABŞ dolları  məbləğində viza rüsumu ödəməlidirlər.

Ölkədə qalma və hərəkət: Krallıqda daimi və ya müvəqqəti yaşamaq üçün yaşayış icazəsi (iqama) əldə etmək lazımdır. Daxili İşlər Nazirliyi tərəfindən rəsmiləşdirilən bu sənəd vasitəsilə əcnəbi krallıq daxilində istənilən yerə hərəkət edə bilər. 2015-ci ilin oktyabr ayının 15-dən başlayaraq ölkədə müvəqqəti və ya daimi yaşamaq üçün verilən yeni MUQEEM adlanan kart sistemi tətbiq olunur. Ətraflı məlumat üçün bax: https://www.eserve.com.sa/muqeem/actions/changeUserLanguage.do

Səudiyyə Ərəbistanında müvəqqəti və ya daimi yaşayan AR vətəndaşları krallıq ərazisini istənilən məqsədlə tərk etmək istəyərkən Səudiyyə Ərəbistanının Daxili İşlər Nazirliyinin Pasport İdarəsindən “çıxış və giriş vizası” (exit and re-entry visa) almalıdır. Bu vizada şəxsin ölkəni tərk etmək və geri qayıtmaq müddətləri qeyd edilir və həmin tarixlərin müddəti keçdiyi təqdirdə vətəndaşın ölkədən çıxmaq və yaxud da ölkəyə qayıtmaq imkanı məhdudlaşdırılır. Giriş-çıxış vizasının etibarlılıq tarixi və digər məlumatları öyrənmək üçün bax: https://www.eserve.com.sa/VVSWeb/

Əlavə məlumat üçün: www.moi.gov.sa

Geyim qaydası: Krallığa səfər etmək istəyən qadınların əynində qolların biləkdən yuxarı, ayaqların oynaqlarından yuxarı bütün bədənin örtülü olduğu geyim olmalı (abaya) və başları bağlı (örpəklə) olmalıdır. 

Sürücülük qaydaları: AR vətəndaşları (yalnız kişilər) Səudiyyə Ərəbistanı Krallığı ərazisində Azərbaycan Respublikasının aidiyyəti orqanı tərəfindən verilmiş sürücülük vəsiqəsi əsasında ölkəyə giriş tarixindən başlayaraq 3 ay müddətində maneəsiz avtomobil sürə bilər. 3 aydan sonra şəxs yerli sürücülük vəsiqəsi əldə etməlidir.

Heyvanların ölkəyə gətirilməsi və aparılması:  Ev heyvanlarının Səudiyyə Ərəbistanına gətirilməsi üçün müəyyən proseduralara əməl edilməlidir:

-Heyvanın baytar qeydiyyat sənədi (peyvənd qeydləri)

-Baytar tərəfindən verilmiş sağlamlıq sənədi (Səudiyyə ərəbistanına giriş tarixinin 30 günü ərzində).

Bu sənədlər Azərbaycanın müvafiq qurumlarında və Səudiyyə Ərəbistanının ölkəmizdəki Səfirliyində notarial qaydada təsdiq edilməlidir.

Gömrük qaydaları: Səudiyyə Ərəbistanına səfər edən şəxslərin əksər dünya ölkələrindəki gömrük qaydalarından fərqli olaraq diqqət edəcəyi əsas məsələ spirtli içkilər və donuz mənşəli ərzaqların gətirilməsinə icazə verilməməsidir.  

Son yenilənmə tarixi: 25 sentyabr 2018-ci il

Arxiv üzrə axtarış